مديت لك يمناي مدي يمينك
ينعش خفوقي لمسة الكف للكف
ردي لي الفرحه عساها سنينك
دمع الحزن توّه بعد شوفتك جف
يازينها اللحظه وعيني بعينك
واحلى المشاعر بيننا ماتوقف
مشاعرٍ تنساب بيني وبينك
تنطق بها النظره بليا تكلف
اشتقت همساتك ولمسة يدينك
بعد الغياب اللي قسى ماتلطف
حبيبتي ياكثر ماقلت وينك
وينك ترى شوقي عن القلب ماخف
بالي معك دايم وقلبي رهينك
وعن سالفة شوقي عيوني تسولف
كنت بعذابي قبل ماشوف زينك
وتحت الحنايا جرح من شوق ينزف
والحين للمجروح مدي يمينك
ترى علاجه لمسة الكف للكف
